Karoling lyrics.. Caroling.. Awit pampasko.. awiting pinoy..

Naku.. Pasko nanaman ng mga katoliko sa ating bansa.. Oo, tanggapin na natin iyon.. Hindi lahat ng naninirahan sa bansa natin ay nagdiriwang ng Kapaskuhan.. Mga Muslim.. at iba pang mga relihiyon.. Pero sa kabila nun ay hindi natin maipagkakaila na sunod sa "Lupang Hinirang" at "Happy Birthday to You" na kanta, ay alam natin ang Kantang Pangkaroling tulad ng "Ang Pasko ay Sumapit" at "Noche Buena". Kung bakit ay dahil napakalakas ng diwa ng Pasko sa Pinas (ewan ko lang ngayon) na kahit ang mga hindi nagdiriwang nito ay walang magawa kundi makinig at manood na lang sa mga taong nasa kanilang paligid dahil mayorya sa mga mamamayan ay nagdiriwang nito. Ang telebisyon, radyo, mall, park at maging sa mga kapit-bahay natin ay masisilayan talaga ang diwa na hindi maaring takasan ng mata at tainga.

____________________________________________________________________ ____________________________________________________________________

Ang mga batang naliligo sa pawis na punong-puno ng dungis ay makikita mong nakagayak at kahit papaano ay nagsusuot ng magagandang damit upang Huntingin ang kani-kanilang mga ninong at ninang, tito at tita, lolo at lola, teacher at principal at mga give-aways mula sa mga suking tindahan at sa mga suking taga-serbisyo. Libreng sumbrero, Kalendaryo at good morning towel na may tatak ng kumpanya at libreng damit na may pangalan ng mga "nagmamahal" na mayor at ni kapitan. Kung bakit sila nakakapagsuot ng mga bagong damit ay dahil sa bonus ng kanilang mga magulang, napanalunan sa mga raffle draw, regalo sa exchange gift at ang pinakamalaking posibilidad ng pinanggalingan, Karoling.

____________________________________________________________________ ____________________________________________________________________

Ang Karoling ay isang pagkanta sa mga bahay-bahay na isinasagawa ng mga bata dati. Pero ngayon nakisawsaw na at nakisalo na ang mga matatanda kaya't ang mga pera na sanang naibibigay sa mga bata ay napupunta pa sa matatanda dahil napansin nila siguro na malaki ang perang maiipon dito kung gagabi-gabihin ang pagbabahay-bahay. Nakahanap na ng kakumpetensiya ang mga bata. Ang kanilang Tansan Tambourine ay tinatapatan ng tamboring original. Ang kanilang Lata drum ay tinapatan ng totoong drum. Ang kanilang Tunog-taong tulad ng kili-kili pwoot, Suntok-sa-pisnging-may-lamang-hangin, Palakpak at padyak ay tinapatan ng gitara, at harmonica. Ang Inosenteng Boses ng mga bata ay tinapatan ng boses na mananakop ng mga matatanda. Kaya pag bata ka, Suwerte ka na sa limang-piso at sa hirap ng buhay lalo na ngayong taong 2008, tataas ng 15 porsiyento ang matatanggap mong PATAWAD kumpara sa nakaraang taon. Kung matanda ka naman, Suwerte ka kung magaling kang humanap ng Galanteng makakarolingan. Pansinin ang salitang Galante. Galante at hindi mayaman. Dahil hindi lahat ng mayaman ay galante dahil ang iba sa kanila ay yumaman dahil sa kanilang karamutan at kakuriputan at hindi lahat ng mahirap o nasa middle class ay kuripot. Tandaan, karamihan sa kanila ay naghirap dahil sa kanilang ka-galantehan, pagtulong sa mga nangangailangan kahit ilang beses na silang naloko, pagpapautang sa mga kaibigan na nagipit at hindi nakabayad, nabaon sa utang dahil gustong pag-aralin ang anak sa pribadong paaralan. Oo, mas marunong silang magbigay. Ang pagbibigay ay hindi nasusukat sa laki ng ibibigay mo kundi sa kung anong matitira sayo pagkatapos mong magbigay. Kasabay ng pagsulpot ng mga Karolingers ay mga taong nananamantala sa tulong ng iba na humihingi ng donasyon dahil nasa hospital ang kanyang anak kahit baog siya at imposible siyang magkaanak, mga taxi driver na bumabati ng merry christmas sabay "keep-the-change na lang mam/sir pwede po ba? pamasko nyo na lang po sa mga anak ko". Mga nanay na sumisipsip sa teacher ng kanilang mga anak na nag-aagawan sa honor sa pamamagitan ng pagpapadala ng Putong maliliit na may keso sa ibabaw at syempre ang walang kamatayang Figurine na angel pang-regalo.

____________________________________________________________________

Pindutin lang ang pamagat kung gusto niyong mapakinggan.. Karamihan sa mga sikat na kantang pampasko ay gawa ni Levi Celerio na isa sa ating National Artist..
--
NOCHE BUENA lyrics

Music: Felipe de Leon

Lyrics: Levi Celerio

--
Kay sigla ng gabi

Ang lahat ay kay saya

Nagluto ang Ate ng manok na tinola

Sa bahay ng Kuya ay mayro'ng litsonan pa

Ang bawat tahanan may handang iba't iba

--
Tayo na giliw

Magsalo na tayo

Mayro'n na tayong

Tinapay at keso

Di ba Noche Buena

Sa gabing ito

At bukas ay araw ng Pasko

____________________________________________________________________

Kumukutikutitap lyrics

Kumukuti-kutitap, bumubusi-busilak

Ganyan ang indak ng mga bombilya

Kikindat-kindat, kukurap-kurap

Pinaglalaruan ang iyong mga mata

--
Iba’t ibang palamuti

Ating isabit sa puno

Buhusan ng mga kulay

Tambakan ng mga regalo

--
Tumitibok-tibok, sumisinok-sinok‘

Wag lang malunod, sasabihin(Pupulu-pulupot)
Paikot nang paikot

Koronahan ng palarang bituin

--
Dagdagan mo pa ng kendi

Ribbon eskoses at bonita

Habang lalong dumadami

Regalo mo’y dagdagan

____________________________________________________________________

Namamasko Lyrics

(Sa may bahay ang aming bati)

--
Sa may bahay, ang aming bati

Merry Christmas' na maluwalhati

Ang pag-ibig ang siyang naghari

Araw-araw ay magiging Paskong lagi

--

Ang sanhi po ng pagparito

Hihingi po ng aginaldo

Kung sakali't kami'y perwisyo

Pasensiya na pagka't kami'y

namamasko.

____________________________________________________________________

Sana mabago na ang pananaw na magpapakabait lang tuwing pasko.
Pasko, Paksiw, Pasko, Paksiw, Pasko, Paskiw.

Isa sa dapat ikarangal ng Pilipino. Disyembreng walang snow pero masaya. Disyembreng ginto ang bilihin ngunit nairaraos pa rin. Disyembreng kumakalansing at nanggigising sa damdamin ng pilipinong baon sa suliranin. Karoling na sariling atin, na panandaliang humahawi sa dilim ng ating damdamin.

____________________________________________________________________

--43pot 43somuch